کراچی… کراچی سمیت سندھ کے متعدد شہروں میں گرد آلود طوفان اور اس کے نتیجہ میں بجلی کے تار گرنے سے خاتون جاں بحق ہوگئیں۔ جیو ٹی وی کے مطابق سول اسپتال کراچی میں عیادت کے لئے آنے والوں کے لئے بنایا گیا شیڈ گرنے سے 2افرادزخمی ہو گئے ،اسپتال ذرائع نے واقعے میں دوافراد کے زخمیوں کی تصدیق کی ہے۔ریسکیوذرائع نے واٹرپمپ کے قریب تیزہواکے باعث ٹین کی چھت اڑنیکی اطلاع دی ہے،کراچی کے ہی علاقے قلندریہ چوک کے قریب دیوار گرنے کے باعث دو خواتین زخمی ہوگئیں۔محکمہ موسمیات کے چیف میٹرولوجسٹ توصیف عالم کا اس حوالے سے کہنا ہے کہ گرد آلود طوفان چند گھنٹوں تک جاری رہے گااور یہ سلسلہ کچھ دیر میں تھم جائے گا،جبکہ یہ طوفان کراچی سمیت سندھ کے کئی علاقوں میں ہے اور نوری آباد، حیدر آباد اور دیگر علاقوں میں بھی طوفان موجود ہے تاہم کراچی میں تیز بارش کا امکان کم ہے ۔چیف میٹرولوجسٹ کے مطابق ہلکی اور تیز ہواوٴں کا سلسلہ کچھ دیر جاری رہے گا،وقتی طور پر ایسی صورتحال پیدا ہوتی ہے،یہ آندھی اور طوفان گرمی کی وجہ سے ہے۔

 

امریکا:کیمپ ڈیوڈ کی ممنوعہ فضائی حدود میں سیسنا طیارے داخل

واشنگٹن… امریکا میں جی ایٹ سربراہ کانفرنس کے موقع پر دو سیسنا طیاروں کی ممنوعہ فضائی حدود کی خلاف ورزی نے امریکی انتظامیہ میں کھلبلی مچا دی۔ دونوں طیاروں کو پینسلوینیا کی ریاست میں واقع یارک ائرپورٹ پر اتار لیا گیا۔ تفصیلات کے مطابق میری لینڈ میں مقامی وقت کے مطابق سات بجے کے قریب پہلا سیسنا طیارہ کیمپ ڈیوڈ میں واقع ممنوعہ فضائی حدود میں داخل ہوا جہاں صدر اوباما کی میزبانی میں جی ایٹ سربراہ کانفرنس جاری ہے۔ امریکی ایف 15طیارے نے فوری طور پر سیسنا طیارے کا راستہ روکا۔ دوسرا واقعہ سات بج کر سترہ منٹ پیش آیا جب ایک دوسرا سیسنا طیارہ بھی ممنوعہ فضائی حدود میں داخل ہوگیا۔ اسے بلیک ہاک ہیلی کاپٹر نے روکا اور پینسلوینیا کی ریاست میں واقع یارک ائرپورٹ پر اتارلیا گیا۔ دونوں پائلٹوں سے پوچھ گچھ جاری ہے تاہم بتایا جاتا ہے کہ دونوں طیارے ریڈیو رابطے منقطع ہونے کی وجہ سے ممنوعہ فضائی حدود میں داخل ہوئے۔